ഉ: ജമാഅത്തെ ഇസ്ലാമിയെ അടുത്തറിയാന് ശ്രമിക്കുന്ന ചോദ്യകര്ത്താവ് നിഷ്പ്രയാസം ലഭിക്കുന്ന അതിന്റെ ഭരണഘടനയോ പോളിസി- പ്രോഗ്രാമോ ശ്രദ്ധിച്ചു വായിച്ചില്ലെന്നത് അദ്ഭുതകരമാണ്. സംശയങ്ങള്ക്ക് കാരണവും അതുതന്നെ. ഇന്ത്യന് ജമാഅത്തെ ഇസ്ലാമി ഭരണഘടനയില് സംഘടനയുടെ ലക്ഷ്യം (ഖണ്ഡിക 4) ഇങ്ങനെ രേഖപ്പെടുത്തുന്നു:
"ഇന്ത്യന് ജമാഅത്തെ ഇസ്ലാമിയുടെ ലക്ഷ്യം ഇഖാമതുദ്ദീന് (ദീന് നിലനിര്ത്തുക) ആകുന്നു. അതിനുള്ള സാക്ഷാല് പ്രേരകശക്തിയാകട്ടെ, അല്ലാഹുവിന്റെ പ്രീതിയും പരലോക വിജയവും സിദ്ധിക്കുകയെന്നതുമത്രേ.''
ഇന്ത്യന് ജമാഅത്തെ ഇസ്ലാമി പോളിസിയില് പ്രബോധനം എന്ന ശീര്ഷകത്തില് പറയുന്നു: "ഇസ്ലാമിന്റെ മൌലികാധ്യാപനങ്ങളായ ദൈവത്തിന്റെ ഏകത്വം, പ്രവാചകത്വം, പാരത്രിക ജീവിതം എന്നിവയും അവയുടെ മൌലിക താല്പര്യങ്ങളും ജനങ്ങള്ക്ക് മനസ്സിലാവുക, ഇസ്ലാം മാത്രമാണ് നീതിയുടെയും കാരുണ്യത്തിന്റെയും ഏക വ്യവസ്ഥിതി എന്നും തങ്ങളുടെ സ്രഷ്ടാവും ഉടമസ്ഥനും പരിപാലകനുമായ ദൈവത്തിനുള്ള നിഷ്കളങ്ക ദാസ്യവൃത്തി സ്വീകരിക്കുന്നതിലാണ് ഐഹികക്ഷേമവും പാരത്രികമോക്ഷവും സ്ഥിതിചെയ്യുന്നതെന്നുമുള്ള യാഥാര്ഥ്യം അവര്ക്ക് വ്യക്തമാവുക, ബഹുദൈവത്വം, നിരീശ്വരത്വം തുടങ്ങിയ മിഥ്യാവിശ്വാസങ്ങളുടെയും ചിന്താഗതികളുടെയും ദൂഷ്യങ്ങളെക്കുറിച്ചും ധാര്മിക തിന്മകളുടെ വിപത്തിനെക്കുറിച്ചും അവര് വേണ്ടത്ര മനസ്സിലാക്കിയിരിക്കുക...''
മുതലാളിത്തം, സോഷ്യലിസം, കമ്യൂണിസം, നാഷണലിസം തുടങ്ങിയ ആധുനിക ഭൌതികദര്ശനങ്ങളാണ് ഇന്ന് മതഭേദമില്ലാതെ എല്ലാ വിഭാഗങ്ങളെയും സ്വാധീനിക്കുന്നത്. അതാണ് ലോകത്തിന്റെ അധഃപതനത്തിന് പ്രധാന കാരണവും. അതിനാല്, കേവലം ആത്മീയമെന്നോ ആധ്യാത്മികമെന്നോ വിവരിക്കപ്പെടുന്ന വശങ്ങളില് ഊന്നി പ്രബോധനം നിര്വഹിക്കുന്നതിന് പകരം, ആത്മീയവും ഭൌതികവുമായ ഇസ്ലാമിന്റെ മേന്മകളെയും നന്മകളെയും സന്തുലിതമായി പരിചയപ്പെടുത്തുകയാണ് ഇസ്ലാമിക പ്രസ്ഥാനം ചെയ്യുന്നത്. ഭൂമിയില് അല്ലാഹുവിന്റെ വ്യവസ്ഥ നടപ്പാക്കുക എന്നത് ആ വ്യവസ്ഥ സമ്പൂര്ണമായി ജനങ്ങള് അംഗീകരിക്കുന്നതിനെ ആശ്രയിച്ചിരിക്കുന്നു. കുതിരക്ക് മുമ്പില് വണ്ടികെട്ടാന് പ്രസ്ഥാനം ഒരുങ്ങിയിട്ടില്ല.
|
